ExoCo-LMD
BAC => BAC-Examens Corrigés => Tamazight => Discussion démarrée par: Samira le Novembre 10, 2022, 09:44:13 AM
BAC 2021 -اختبار في مادة اللغة الأمازيغية
Abeddel deg tudert
Ferruǧa, yefreḥ wul-is imi tufa win i yettxemmimen fell-as, tḥulfa i leḥnana am tin n yemmas i as-yettwakksen acḥal n yiseggasen aya.[...] Taqcict, yekcem-itt lferḥ deg uxxam n xalti-s ; awal
d teḍsa, zgan ɣef yimi-s mačči am wasmi tella gar wid i yessaẓin awal yid-s, terra-tt i tsusmi akken
ad ttun wiyaḍ tella deg uxxam ɣur-sen, tefka idis-is i tmes.
Ferruǧa, tbeddel fell-as tegnit, tekcem ɣer uɣerbaz ; ad telmed cwiṭ iwakken ad tissin ad
temmeslay, ad taru... rnu ad as-tifsus tudert deg temdint n Lezzayer.
Tsedduy-itt xalti-s akked teqcicin n lǧiran akken ad telmed daɣen lexyaḍa acku urɛad tennum
tuffɣa iman-is. Dacu kan seg tikkelt ɣer tayeḍ, tetteffeɣ ɣer tḥuna i yellan sdat uxxam, tqeṭṭu-d kra
n wayen i tent-ixussen.
Simmal ttɛeddin wussan, yettban-d ubeddel ɣef Ferruǧa ama deg umeslay ama deg wudem.
Tetteffeɣ, tkeččem, telmed akk amek i ttidiren medden deg temdint tameqqrant am Lezzayer ;
tettlusu akken ttlusun din, teǧǧa takessiwt-nni deg uxxam, tettlusu-tt yal mi ara d-tekcem.
Deg ccbaḥa, tettnerni imi kksen deg-s yiɣeblan d tirni. Ayen i telsa ad yerr fell-as, d tasedda
gar tullas. Lqedd-is d amnaṣef, yecbeḥ, yettrusu ɣef wallen ; terfed aksum azal-is, yedda ɣef tiddis. Temlel n wudem-is, tugar tin n udfel. Berriket timmi-ines. Acebbub-is, ticki ara as-tserreḥ,
yettaweḍ s ammas-is. Werriɣ umemmu n tiṭ-is, ad as-tiniḍ tuker-it-id i yiṭij. Allen-is, d tid
meẓẓiyen maca sɛant sser ; mi ara tettmuquleḍ ɣur-sent, ttawint leɛqel. Udem-is d imdewwer amzun
d ayyur yemmden. Leḥnak-is d wid yeččuren ; tikwal, ticki ara teɛyu neɣ ara tessetḥi, ttizwiɣen.
Taḍsa-s trennu-as deg ccbaḥa ; mi ara tettmeslay, tessixfif deg lhedra. Uglan-is ɛedlen, cebḥen
akken i rsen ; win ɣer win. Akken i texdem melliḥet, ama thedder ama tsusem, melliḥet ɣas tettru.
Yiwen n wass am tal tikkelt, teṭṭef abrid n tuffɣa ɣer berra iman-is imi tura dayen tennum
tettruḥu s anda akken tlemmed lexyaḍa. Tleḥḥu deg ubrid alarmi qrib ad taweḍ, yeḍfer-itt yiwen n
yilemẓi s deffir, yegzem-as-d abrid.
- Suref-iyi, ad am-iniɣ sin n yimeslayen ; tɛeǧbeḍ-iyi, ẓer ul-im kemmini d acu ara am-yini !
[...]
Ferruǧa, tkemmel tikli-s ɣer ccɣel-is, dacu kan sya ɣer da tettxemmim ɣef wayen akken i asyenna winna i d-temlal.